ॐ
✦
ॐ
- ताडेताईंची मंजुळ वाणी, गोड अभंग अन् अनुभव गाणी
- संत साहित्याची ती खाणी, अनुभवांची लेविली लेणी
- प्रेमळ आणिते नेत्रा पाणी, सैपाकाने मुखा पाणी
- रमते सर्वात अलिप्तपणी, अनुसंधानित सोऽहं ध्वनी
- स्वरूपानंदांची शिष्या गुणी, देखिली ना ऐसी योगिनी आणी
- सुकृतात मांडिली ठाणी, दर्शने कृष्णदासा धन्यता आणी
श्रीमत् संजीवनी गाथा - अभंग क्र. १
- भक्ताचे अंतरी सांवळा श्रीहरी ।
- सुखें वास करी सर्वकाळ ॥१॥
- म्हणोनि तयासी विश्व हरि-रूप ।
- झालें आपेंआप अखंडित ॥२॥
- हरि-रूप काया हरि-रूप माया ।
- हरि-रूप जाया-पुत्र-वित्त ॥३॥
- हरि-रूप कर्म हरि-रूप धर्म ।
- भक्तीचें हें वर्म स्वामी म्हणे ॥४॥
श्रीमत् संजीवनी गाथा - अभंग क्र. २
- कैंचा भक्त कैंचा देव ।
- हरि-रुप झालें सर्व ॥१॥
- देव-भक्तां पडे मिठी ।
- अंतर्बाह्य जगजेठी ॥२॥
- सर्वां ठायीं सर्वां घटीं ।
- हरि नांदे पाठीं पोटीं ॥३॥
- एक झालें मी-तूं-पण ।
- स्वामी म्हणे भलें मौन ॥४॥
श्रीमत् संजीवनी गाथा - अभंग क्र. ३
- अंतर्बाह्य राम झालों पूर्ण-काम ।
- देखियेलें ब्रह्म मूर्तिमंत ॥१॥
- आनंदला जीव भेटला केशव ।
- गेलों भवार्णव तरोनियां ॥२॥
- काम क्रोध लोभ दंभ मोह मान ।
- अवघें नारायण-रूप झालें ॥३॥
- काया वाचा मन केलें कृष्णार्पण ।
- गेलें मी-तूं-पण स्वामी म्हणे ॥४॥
श्रीमत् संजीवनी गाथा - अभंग क्र. ४
- निर्भय निश्चिंत निवांत निरार्त ।
- रतलेंसे चित्त हरिपायीं ॥१॥
- सांडिला संसार व्हावया उद्धार ।
- केली सारासार-विचारणा ॥२॥
- हरि-कृपाबळें लाधला सत्संग ।
- सांपडला मार्ग स्वानंदाचा ॥३॥
- स्वामी म्हणे मज आकळलें गुज ।
- देखिलें सहज आत्म-रूप ॥४॥
श्रीमत् संजीवनी गाथा - अभंग क्र. ५
- सद्गुरु गणनाथ उदार समर्थ ।
- घाली नयनांत ज्ञानांजन ॥१॥
- सहज-समाधि सांपडलें धन ।
- लाचावलें मन तया ठायीं ॥२॥
- चालतां बोलतां न ढळे आसन ।
- न भंगे तें मौन कदा काळीं ॥३॥
- स्वामी म्हणे लाभे अवीट आनंद ।
- लागलासे छंद स्वरूपाचा ॥४॥
श्रीमत् संजीवनी गाथा - अभंग क्र. ६
- शरण जातां रमा-वरा ।
- सर्व सुखें आलीं घरा ॥१॥
- ऋद्धि-सिद्धी उभ्या दासी ।
- सदा सादर सेवेसी ॥२॥
- धन्य जाहलो संसारी ।
- हरि-रूप नर नारी ॥३॥
- स्वामी म्हणे सौख्य कंद ।
- वसे अंतरीं गोविंद ॥४॥
श्रीमत् संजीवनी गाथा - अभंग क्र. ७
- राम कृष्ण हरि गोविंद ।
- मना लागो हा चि छंद ॥१॥
- भक्ति-भावें रात्रं-दिन ।
- घडो चित्ता हरि-चिंतन ॥२॥
- हरि-नाम पडो कानीं ।
- हरि-नाम गर्जो वाणी ॥३॥
- दृष्टीलागीं एक मात्र ।
- हरि दिसों दे सर्वत्र ॥४॥
- स्वामी म्हणे सर्वथैव ।
- हरिपायीं जडो जीव ॥५॥ ✦ ✦ ✦
श्रीमत् संजीवनी गाथा - अभंग क्र. १२
- हरि-रूप जाण मृत्तिका पाषाण ।
- ग्रह तारांगण हरि-रूप ॥१॥
- अथांग सागर अनंत आकाश ।
- पवन नि:शेष हरि-रूप ॥२॥
- मन बुद्धी अहं अष्टधा प्रकृती ।
- मूळमाया-व्यक्ति हरि-रूप ॥३॥
- एकला चि हरि नांदे सर्वां घटीं ।
- आदि-मध्य-अंतीं स्वामी म्हणे ॥४॥
श्रीमत् संजीवनी गाथा - अभंग क्र. १४
- जीवा-शिवाचा संयोग ।
- हाचि माझा राजयोग ॥१॥
- भेद-भाव हारपला ।
- हरि एकला संचला ॥२॥
- दूर झाली आधी-व्याधी ।
- लागे अखंड समाधि ॥३॥
- स्वामी बैसला स्व-स्थानीं ।
- हरि-रूप ध्यानीं मनीं ॥४॥ ✦ ✦ ✦
श्रीमत् संजीवनी गाथा - अभंग क्र. १६
- हरिपायीं लीन झालें माझें मन ।
- तेणें समाधान अखंडित ॥१॥
- प्राणाचा प्रणव सहज पवन-जय ।
- झाला गगनीं लय गगनाचा ॥२॥
- गगनाचे पालवें गाळुनि घेतलें ।
- तें चि म्यां देखिलें पर-तत्व ॥३॥
- स्वामी म्हणे गेला द्रष्टा-दृश्य-भाव ।
- कोंदाटला देव अंतर्बाह्य ॥४॥
श्रीमत् संजीवनी गाथा - अभंग क्र. १७
- कृपावंत भला सद्गुरु लाभला ।
- अंगीकार केला तेणें माझा ॥१॥
- अंतरींची खूण दाखवोनी मज ।
- सोऽहं-मंत्र गुज सांगितलें ॥२॥
- ठायीं चि लागली अखंड समाधि ।
- संपली उपाधि अविद्येची ॥३॥
- स्वामी म्हणे देव सर्वत्र संचला ।
- संसार तो झाला मोक्ष-मय ॥४॥ ✦ ✦ ✦
श्रीमत् संजीवनी गाथा - अभंग क्र. ५२
- भावें हरि-नाम धरिसील कंठी ।
- तरी चि वैकुंठीं वास घडे ॥१॥
- एक वेळ पडे हरि-नाम कानीं ।
- पातकांची खाणी दग्ध होय ॥२॥
- हरि-नाम सार हरि-नाम सार ।
- तेणें चि भव-पार पावसील ॥३॥
- स्वामी म्हणे अंतीं हरि-नाम एक ।
- तारील नि:शंक तुजलागीं ॥४॥
श्रीमत् संजीवनी गाथा - अभंग क्र. ६५
- गुरुकृपेविण नाहीं आत्म-ज्ञान ।
- वाउगा तो शीण साधनांचा ॥१॥
- सहज-साधन गुरु-कृपा जाण ।
- जीवाचें कल्याण तेणें होय ॥२॥
- गुरु माता पिता गुरु चि देवता ।
- गुरु मुक्ति-दाता ऐसें मानीं ॥३॥
- गुरु-सेवेवीण जावों नेदीं क्षण ।
- तेणें तो प्रसन्न स्वामी म्हणे ॥४॥
श्रीमत् संजीवनी गाथा - अभंग क्र. ७६
- आणिकांते वाटे संसाराचें भय ।
- आम्हांसी तो होय सुख-रूप ॥१॥
- संतत अंतरी राहे श्रीगोपाळ ।
- बापुडा तो काळ आम्हांपुढे ॥२॥
- सेवेसाठी सुखें साहूं गर्भवास ।
- होऊं हरि-दास जन्मोजन्मीं ॥३॥
- स्वामी म्हणे भावें करूं संकीर्तन ।
- सवें थोर-सान घेवोनियां ॥४॥
श्रीमत् संजीवनी गाथा - अभंग क्र. ८८
- माझें मजपाशीं सापडलें धन ।
- आनंदलें मन आत्म-रंगी ॥१॥
- सोडवेना मज नित्य नवी गोडी ।
- सेवितों आवडी ब्रह्म-रस ॥२॥
- सन्निध तें परी होतें दुरावलें ।
- गुरु-कृपा-बळे आंगवलें ॥३॥
- प्राणाचा प्रणव मनाचें उन्मन ।
- होतां समाधान स्वामी म्हणे ॥४॥
श्रीमत् संजीवनी गाथा - अभंग क्र. ९१
- स्वच्छंद निर्मल वाहतो निर्झर ।
- आम्हां साक्षात्कार गोविंदाचा ॥१॥
- करी गुंजारव पंकजीं भ्रमर ।
- आम्हांसी गजर हरि-नामाचा ॥२॥
- उद्यानीं कोकिळ गातसे संगीत ।
- आम्हां हरि-गीत आवडे तें ॥३॥
- अखंड गंभीर गर्जतो सागर ।
- आम्हां सोऽहं-स्वर स्वामी म्हणे ॥४॥
श्रीमत् संजीवनी गाथा - अभंग क्र. ९३
- रूप तुझे देवा दाखवीं केशवा ।
- मुकुंदा माधवा नारायणा ॥१॥
- अच्युता अनंता कृष्ण दामोदरा ।
- गोविंदा श्रीधरा हृषीकेशा ॥२॥
- हरि-जनार्दना रुक्मिणि-रमणा ।
- देवकी-नंदना वासुदेवा ॥३॥
- स्वामी म्हणे मज हा चि निदिध्यास ।
- पूर्ण करीं आस दर्शनाची ॥४॥
श्रीमत् संजीवनी गाथा - अभंग क्र. १0३
- भाविकाची चिंता वाहे भगवंत ।
- पाहे हिताहित तो चि त्याचें ॥१॥
- आड येतां विघ्न घेतसे धांवणे ।
- रक्षायाकारणें भाविकातें ॥२॥
- जें जें वांछी मन तें तया देऊन ।
- न्यून करी पूर्ण भाविकाचें ॥३॥
- स्वामी म्हणे कैसा स्पर्शों शके काळ ।
- सांभाळी गोपाळ भाविकातें ॥४॥
श्रीमत् संजीवनी गाथा - अभंग क्र. १0६
- संतांची संगति घडो सर्वकाळ ।
- आवडो गोपाळ अंतर्यामीं ॥१॥
- काम क्रोध लोभ निमोत आघवे ।
- रमो चित्त भावें हरिपायीं ॥२॥
- जळो तो मत्सर गळो मोह मद ।
- लागो मना छंद गोविंदाचा ॥३॥
- विषयांची गोडी न वाटो जीवास ।
- लागो हरि-ध्यास स्वामी म्हणे ॥४॥
श्रीमत् संजीवनी गाथा - अभंग क्र. ११२
- भावें रामकृष्ण बोलूं ।
- प्रेमे कीर्तनांत डोलूं ॥१॥
- मन करोनि तल्लीन ।
- ध्याऊं हरीचे चरण ॥२॥
- करूं नामाचा गजर ।
- सुखें हेोऊं भव-पार ॥३॥
- स्वामी म्हणे रात्रं-दिन ।
- घेऊं देवाचे दर्शन ॥४॥
श्रीमत् संजीवनी गाथा - अभंग क्र. ११३
- खेळविसी तैसा खेळेन साचार ।
- तूं चि सूत्र-धार बाहुलें मी ॥१॥
- देवा तूं चि धनी मी तुझा चाकर ।
- तुझा चि आधार मजलागीं ॥२॥
- बेोलविसी तैसे बोलेन वचन ।
- मज अभिमान कासयाचा ॥३॥
- काया वाचा मन तुझ्या चि आधीन ।
- तुझ्या पायीं लीन स्वामी म्हणे ॥४॥
श्रीमत् संजीवनी गाथा - अभंग क्र. १२२
- कृपावंत थोर सद्गुरु उदार ।
- तेणें योग सार दिलें मज ॥१॥
- मन-पवनाची दाखवोनी वाट ।
- गगनाशीं गांठ बांधियेली ॥२॥
- शून्य-नि:शून्याचें बीज महा-शून्य ।
- भेटविलें धन्य हरि-रूप ॥३॥
- स्वामी म्हणे माझा नाथ-संप्रदाय ।
- अवघें हरिमय योग-बळें ॥४॥
श्रीमत् संजीवनी गाथा - अभंग क्र. १२९
- काय सांगू संत-कृपेचा नवलाव ।
- प्रकटला देव अंतर्यामीं ॥१॥
- सोऽहं सोंऽहं ऐसा नित्य निदिध्यास ।
- लागला जीवास आपेंआप ॥२॥
- लिहितां वाचितां बोलतां बैसतां ।
- देतां घेतां खातां हिंडतां हि ॥३॥
- तिन्ही अवस्थांचा झालों साक्षीभूत ।
- राहिलों निवांत स्वामी म्हणे ॥४॥
श्रीमत् संजीवनी गाथा - अभंग क्र. १३१
- आम्हां रात्रं-दिन हरीचें चिंतन ।
- हरि-पायीं मन स्थिरावलें ॥१॥
- आतां अंतर्बाह्य हरीचें दर्शन ।
- झालें त्रि-भुवन हरि-रूप ॥२॥
- देखतां चरण गेलें मी-तूं-पण ।
- संसाराचे भान हारपलें ॥३॥
- ध्येय-ध्याता-ध्यान होउनी आपण ।
- खेळे नारायण स्वामी म्हणे ॥४॥
श्रीमत् संजीवनी गाथा - अभंग क्र. १३३
- नमो जय जय सद्गुरुराव ।
- देहीं दाखविला देव ॥१॥
- पाजळुनि ज्ञान-ज्योति ।
- दूर केली भव-भ्रांति ॥२॥
- होवोनियां गुणातीत ।
- जगीं वर्ते साक्षीभूत ॥३॥
- स्वामी म्हणे नि:संदेह ।
- झालों देहीं चि विदेह ॥४॥ ✦ ✦ ✦
श्रीमत् संजीवनी गाथा - अभंग क्र. १५0
- अंतरी संतत करीं सोऽहं ध्यान ।
- न जाई गुंतून संसारात ॥१॥
- धन सुत दारा असूं दे पसारा ।
- नको देऊ थारा आसक्तीतें ॥२॥
- होवो हानि-लाभ पावो सुख-दु:ख ।
- न सोडीं विवेक साक्षित्वाचा ॥३॥
- स्वामी म्हणे राहें देहीं उदासीन ।
- पाहें रात्रं-दिन आत्म-रूप ॥४॥ ✦ ✦ ✦
श्रीमत् संजीवनी गाथा - अभंग क्र. १५३
- सखा माझा नारायण ।
- करी चिंता निवारण ॥१॥
- मज सांवरितां हरि ।
- आलीं विघ्नें दूर करी ॥२॥
- दोष जाळुनि समस्त ।
- शुद्ध करी माझें चित्त ॥३॥
- तो चि लक्षी माझें हित ।
- स्वामी म्हणे मी निश्चिंत ॥४॥
श्रीमत् संजीवनी गाथा - अभंग क्र. १६५
- घडे जें स्वभावें कर्म तें आघवें ।
- भावें समर्पावे हरिपायीं ॥१॥
- देता घेता कर्ता भोक्ता नारायण ।
- भाव परिपूर्ण असों द्यावा ॥२॥
- तेणें शुभाशुभ-कर्माचें बंधन ।
- न लागतां जाण मोक्ष-लाभ ॥३॥
- स्वामी म्हणे भक्तीपासीं चारी मुक्ती ।
- ऐसी चि प्रचीति आली मज ॥४॥
श्रीमत् संजीवनी गाथा - अभंग क्र. १६७
- नाथ-संप्रदायी आम्ही कानफाटे ।
- जाऊं नका वाटे आमुचिया ॥१॥
- मन-पवनाची घालोनियां गांठ ।
- करूं वाताहात संसाराची ॥२॥
- देहासवें पुसूं लौकिकाचे नांव ।
- नेदूं उरों ठाव जीवासी हि ॥३॥
- स्वामी म्हणे तुम्हां बुडवूं महा-शून्यीं ।
- गगनासी आटणी होय जेथें ॥४॥
श्रीमत् संजीवनी गाथा - अभंग क्र. १७२
- पाहे ज्याची दृष्टि सर्वत्र श्रीहरि ।
- भक्त तो संसारीं भाग्यवंत ॥१॥
- रामकृष्ण हरि उच्चारी वैखरी ।
- भक्त तो संसारी भाग्यवंत ॥२॥
- आठवी श्रीहरी नित्य हृदंतरीं ।
- भक्त तो संसारीं भाग्यवंत ॥३॥
- स्वामी म्हणे भक्तीपासीं चारी मुक्ति ।
- भाग्या नाहीं मिति भक्ताचिया ॥४॥
श्रीमत् संजीवनी गाथा - अभंग क्र. १८0
- अनाथांचा नाथ पतित-पावन ।
- सज्जन-जीवन वासुदेव ॥१॥
- दुर्बलांचा वाली सखा दीन-बंधु ।
- कारुण्याचा सिंधु वासुदेव ॥२॥
- शरणागता हात देई सदोदित ।
- संतांचे दैवत वासुदेव ॥३॥
- स्वामी म्हणे देव भाविकां माउली ।
- कृपेची साउली करीतसे ॥४॥ ✦ ✦ ✦
श्रीमत् संजीवनी गाथा - अभंग क्र. १९२
- निर्वातींचा दीप तेवतो निवांत ।
- तैसें राहो चित्त सर्वकाळ ॥१॥
- आला गेला मेघ उदास गगन ।
- तैसें राहो मन सुख-दु:खीं ॥२॥
- असोनियां जळीं अलिप्त राजीव ।
- राहो तैसा जीव उपाधींत ॥३॥
- स्वामी म्हणे सदा असावें संतुष्ट ।
- स्व-रूपीं प्रविष्ट होवोनियां ॥४॥ ✦ ✦ ✦
श्रीमत् संजीवनी गाथा - अभंग क्र. १९६
- मागणें हें एक देईं भक्ति-प्रेम ।
- देवा तुझें नाम गाईन मी ॥१॥
- आवडीनें देवा गुण मी वर्णीन ।
- प्रेमें न्याहाळीन रूप तुझें ॥२॥
- भक्ति-भावें तुझे करीन पूजन ।
- अंतरी चिंतन निरंतर ॥३॥
- स्वामी म्हणे पायीं ठेवीन मी माथा ।
- तेणें माझ्या चित्ता समाधान ॥४॥
श्रीमत् संजीवनी गाथा - अभंग क्र. १९७
- विवेकाचा गांव वैराग्याचा ठाव ।
- योगाचें वैभव साधुसंत ॥१॥
- भक्तीचे जिव्हार ज्ञानाचें भांडार ।
- शांतीचे माहेर साधुसंत ॥२॥
- चैतन्याचा प्राण सुखाचें निधान ।
- विश्रांतीचे स्थान साधुसंत ॥३॥
- स्वामी म्हणे संत आनंदाची खाण ।
- मूर्तिमंत जाण परब्रह्म ॥४॥
श्रीमत् संजीवनी गाथा - अभंग क्र. १९८
-
i> सांपडलें मज अंतरीं निधान ।
- सद्गुरु चरण उपासितां ॥१॥
- अवघे त्रि-भुवन झालें सच्चिद्घन ।
- आनंदे परिपूर्ण आत्म-रूप ॥२॥
- प्रकटला देव गेला देह-भाव ।
- हरपला ठाव लौकिकाचा ॥३॥
- स्वामी म्हणे आतां देवाचे दर्शन ।
- नित्य घडे जाण आत्म-रूपीं ॥४॥
श्रीमत् संजीवनी गाथा - अभंग क्र. २00
- मज अंतरीचा जाणोनियां भाव ।
- पूर्ण करी देव मनोरथ ॥१॥
- आतां मजलागी काय उणें जगी ।
- आवडीने भोगीं शांति-सुख ॥२॥
- झालें अंतर्बाह्य देवाचे दर्शन ।
- स्थिरावलें मन देवापायीं ॥३॥
- स्वामी म्हणे सुख भोगितां अमूप ।
- झालों सुख-रूप आपेंआप ॥४॥
श्रीमत् संजीवनी गाथा - अभंग क्र. २0६
- उच्चारितां नाम आनंदलें मन ।
- दाटले लोचन प्रेमाश्रूंनीं ॥१॥
- घामेजली काया झाली रोमांचित ।
- थरारे कंपित होवोनियां ॥२॥
- कंठ सद्गदित स्तब्ध झालें चित्त ।
- होती विगलित सर्व गात्रें ॥३॥
- स्वामी म्हणे अंती गेलें देह-भान ।
- प्रेमें होतां लीन आत्म-रूपीं ॥४॥
श्रीमत् संजीवनी गाथा - अभंग क्र. २१४
- सद्गुरु-स्वरूप अगाध अपार ।
- काय मी पामर कैसें वानूं ॥१॥
- देखतां चि पडे ब्रह्मादिकां मौन ।
- निर्गुणाचे गुण काय बोलूं ॥२॥
- नव्हे तें निर्गुण नव्हे तें सगुण ।
- तयाचें लक्षण काय सांगूं ॥३॥
- स्वामी म्हणे भाव ठेवा पायापासीं ।
- तरी चि तुम्हांसी आतुडेल ॥४॥
श्रीमत् संजीवनी गाथा - अभंग क्र. २१६
- बैसोनि एकांतीं करीं सोऽहं ध्यान ।
- तेणें तुझें मन स्थिरावेल ॥१॥
- ‘सोऽहं' ‘सोऽहं' ऐसा शब्दाविण जप ।
- होतां आपेंआप चित्त-शुद्धि ॥२॥
- कैसा शब्दाविण होतो ‘सोऽहं-ध्वनि' ।
- घेई विचारोनि संतांपासीं ॥३॥
- स्वामी म्हणे जाईं संतांसी शरण ।
- तेणें उद्धरण होय तुझें ॥४॥
श्रीमत् संजीवनी गाथा - अभंग क्र. २२१
- देवपिसा झालों नामी आनंदलो ।
- आतां नका बोलों दुज्या गोष्टी ॥१॥
- प्रपंचाची वार्ता न ये माझ्या कानीं ।
- न देखें नयनीं जन-लोक ॥२॥
- जेथें पाहें तेथें दिसे वासुदेव ।
- वेडावला जीव जडे पायीं ॥३॥
- स्वामी म्हणे माझी रंगली हे वृत्ति ।
- आठवितां चित्तीं वासुदेव ॥४॥
श्रीमत् संजीवनी गाथा - अभंग क्र. २२६
- हरि तुझी मूर्ति दिसे सर्वां भूतीं ।
- असे तुझी वस्ती चराचरीं ॥१॥
- तुजविण ठाव नसे अणुमात्र ।
- व्यापुनी सर्वत्र राहिलासी ॥२॥
- काय वर्णूं तुझे नाम रूप गुण ।
- सगुण निर्गुण तूं चि एक ॥३॥
- स्वामी म्हणे तूं चि विश्वाचे जीवन ।
- समर्पिलें मन तुझ्यापायीं ॥४॥
श्रीमत् संजीवनी गाथा - अभंग क्र. २२८
- सदा माझें मन राहो सावधान ।
- कदा न हो भान प्रपंचाचें ॥१॥
- चैतन्यीं तद्रूप होवो माझें चित्त ।
- नायकोनि मात विषयांची ॥२॥
- जडो माझा जीव नित्य पर-ब्रह्मीं ।
- अहंकार-उर्मि सांडोनियां ॥३॥
- स्वामी म्हणे घडो अभेद भजन ।
- सहज-समाधान निरंतर ॥४॥
श्रीमत् संजीवनी गाथा - अभंग क्र. २३२
- येई रखुमाईच्या वरा ।
- हात देईं या पामरा ॥१॥
- बुडालों मी भव-सागरीं ।
- धांव पाव गा लौकरी ॥२॥
- नको पाहूं माझा अंत ।
- मी तों अजाण पतित ॥३॥
- मज नेई पैल तीरा ।
- तूं चि पतित-पावन खरा ॥४॥
- स्वामी म्हणे उडी घालीं ।
- ब्रीद आपुलें सांभाळी ॥५॥ ✦ ✦ ✦
श्रीमत् संजीवनी गाथा - अभंग क्र. २३५
- घेईं घेईं जीवा स्व-रूपाचा ध्यास ।
- पुरे हा हव्यास प्रपंचाचा ॥१॥
- विटे ऐसी गोडी नव्हे स्व-रूपाची ।
- सांगती ऐसें चि साधु-संत ॥२॥
- संतांचे वचनीं ठेवोनि विश्वास ।
- करीं गा अभ्यास आवडीने ॥३॥
- स्वामी म्हणे भावे भोगी आत्मानंद ।
- अवीट अखंड शांति-रूप ॥४॥
श्रीमत् संजीवनी गाथा - अभंग क्र. २४६
- जेथें जेथें माझें हिंडेल हे मन ।
- तुझें चि दर्शन तेथें होवो ॥१॥
- तुजविण देवा न दुजी वासना ।
- शिवो माझ्या मना कदा काळी ॥२॥
- वाहो माझे मन तुझा चि संकल्प ।
- तेणें आपेंआप स्थिरावेल ॥३॥
- स्वामी म्हणे माझी पूर्ण करीं आस ।
- ना तरी उदास जिणें वाटे ॥४॥ ✦ ✦ ✦
श्रीमत् संजीवनी गाथा - अभंग क्र. २४७
- सांगशील तैसा वर्तेन अनंता ।
- जाणतसें सत्ता एक तुझी ॥१॥
- आपुलें व्यक्तित्व वाहिलें चरणीं ।
- घ्यावें सांभाळोनी आतां मज ॥२॥
- तुझ्या चि नामाचा घेउनी आधार ।
- पाववीन पार जड जीवां ॥३॥
- स्वामी म्हणे मज तुझें कृपा-बळ ।
- म्हणोनि हा खेळ खेळतसें ॥४॥
श्रीमत् संजीवनी गाथा - अभंग क्र. २४९
- देसी तरी देईं देवा मजप्रति ।
- संतांची संगति सर्वकाळ ॥१॥
- हें चि एक मज पुरे वर-दान ।
- न मागे ह्याहून दुजें कांहीं ॥२॥
- आवडीनें जीव जडो संतांपायीं ।
- भावें घडो कांहीं सेवा त्यांची ॥३॥
- स्वामी म्हणे रंगे नित्य संत संगे ।
- होईन निजांगे शांति-रूप ॥४॥
श्रीमत् संजीवनी गाथा - अभंग क्र. २५२
- आलीं विघ्नें दूर सारुनि सहज ।
- उद्धरिलें मज पांडुरंगे ॥१॥
- लडिवाळपणे घेतली जे आळी ।
- ते तूं पूर्ण केली आवडीने ॥२॥
- सर्व काळ माझें लक्षोनियां हित ।
- सांभाळूनी नीट चालविलें ॥३॥
- स्वामी म्हणे कैसा होऊं उतराई ।
- तुझ्या पायीं डोई ठेवियेली ॥४॥
श्रीमत् संजीवनी गाथा - अभंग क्र. २५३
- आड येतां विघ्न सोडी सुदर्शन ।
- भक्तां नारायण सांभाळितो ॥१॥
- धरोनियां हात नेई पैलतीरा ।
- सोडवी संसारापासोनियां ॥२॥
- पतित-पावन अनाथांचा नाथ ।
- पुरवी मनोरथ भाविकांचे ॥३॥
- स्वामी म्हणे होई दासाचा हेि दास ।
- येई नाना वेष धरोनियां ॥४॥
श्रीमत् संजीवनी गाथा - अभंग क्र. २६0
- कैंचा आत्मा कैंचा देह ।
- माझा मी चि नि:संदेह ॥१॥
- कैंचें कर्म कैंचा कर्ता ।
- अवघी एक माझी सत्ता ॥२॥
- कैंचें विश्व कैंचें भान ।
- मी चि आपणा प्रमाण ॥३॥
- गिळोनिया मीतूंपण ।
- स्वामी झाला सच्चिद्घन ॥४॥
श्रीमत् संजीवनी गाथा - अभंग क्र. २६१
- राम-नामीं रंगे मन ।
- कैंची भूक कैंची तहान ॥१॥
- कैंचा राहे देह-भाव ।
- नुरे दिक्कालासी ठाव ॥२॥
- कैंची आधि कैंची व्याधि ।
- अवघी संपली उपाधि ॥३॥
- नित्य निवांत निर्भय ।
- स्वामी झाला राममय ॥४॥
॥ कृपावंत अति अगाध किर्ती, श्री गुरुदत्त कृष्ण सरस्वती ॥
✦ ✦ ✦