ॐ
- का होता येत नाही आपणाला विराट
- त्या विराटाचे अंश असताना…
- कुणी अडवली आहे ती महत् जाणीव?
- कोष केला आहे. आपणच… आपणाभोवती…
- इवलेसे जगत्, इवलेसे ज्ञान, आखूड कल्पना
- त्याच्या मर्यादा आखल्या आहेत आपणच आपणाभोवती
- अहंकाराचा फुगा. मिसळून देत नाही विराट आकाशात, आतील हवेला…
- सामावण्यासाठी तयार आहे ते विराट, पण हा फुगा फोडायचा कुणी?
- कोषाच्या बाहेर नाही कुणी तयार जाण्यासाठी
- विसरण्यासाठी नाही कुणी तयार, स्वत:ला…
- आपणच ठरविले आपणास श्रेष्ठ. इतरांपेक्षा…
- भीती वाटते स्वत:ला विसरुन टाकण्याची…
- मी असा…, मी तसा…
- पण त्याग त्याचा कराल तर… मी कसा? …
- तर विराट, सर्व विश्वच माझ्या पोटात…
- माझीच सर्व रुपे, नटलेली विविध रुपात…
- नाही द्वेष, नाही मत्सर
- आनंदाची अविरत लहर
- मीच भरुन राहिलो, सर्वचि चराचर
कृष्णदास
✦ ✦ ✦
ॐ
- अनंत आहे हा प्रांत…. अनंताचा
- अनंत काळ अनंत ऋषी-मुनी बैसले आहेत या शोधात
- अनंत जन्मांच्या अनंत संस्कारांच्या गाठी सोडवत
- चेतना जी व्याप्त आहे देहभर… देहच मी समजत…
- तिला वळवायचे आहे आत आत … केंद्राकडे
- जो दडला नाही केवळ आत
- तर… तोच केंद्र व्यापून आहे चराचरात
- पिंडी ते ब्रह्मांडी…
- हीच आहे विराटाच्या प्रवासाची नांदी!
- श्वास जातो विरत… केवळ जाणीव उरत…
- नाही भान काळाचे… नाही उरत अस्तित्वाचे…
- आणी काय त्यापुढे???
- केंद्रच जाणतो केंद्राला !
कृष्णदास
✦ ✦ ✦
ॐ
- या विराट विश्वात आहेत अनंत जीव, अनंत आशा प्रत्येकाच्या मनात…
- काही जन्मत:च, काही नैसर्गिक तर काही इतरांचे पाहून उमललेल्या
- काही साध्य, काही अंशत:, पण बर्याचश्या असाध्य
- साध्य ठेवून जातात ठसा मनावर, सुरु करत शृंखला नव्या नव्या…
- असाध्य सुरु करतात असमाधानाचे व्रण, चिघळणारे मधुमेहीसारखे…
- आसक्ती अन् मत्सर यांची निर्मिती करुन
- दोन्ही नेतात दूर दूर… केंद्रापासून, विखुरलेल्या मनास
- अशुद्ध करत जाणीव, जी होती शुद्ध, निर्मितीच्या वेळेस
- आकळू शकत नाही ती आज स्वत:च स्वत:ला…
- गुलाम झाली आहे देहभोगाला, आनंदाचा स्त्रोत समजून
- जाणवू देत नाही आनंदस्वरूप, स्वत:चे स्वत:ला
- बद्ध अन् मर्यादित केले आहे स्वत:च्या स्वरूपाला
- अनभिज्ञ झाली आहे स्वत:च्या विराट रुपाला
- मग… काय करावे…
- निरखा प्रत्येक उर्मीला, तटस्थपणे,.. केन्द्रापासून न ढळता
- अवधी होईल कमी कमी, केंद्रापासून ढळणारा, जो नेतो स्वरूपापासून दूर
- मग व्हाल क्षणोक्षणी आनंदात चूर!
- विरेल सारी अशुद्धता, उरेल पूर्ण शुद्धता, जाणीवेची, जी आहे विराट!!!
कृष्णदास
✦ ✦ ✦
ॐ
- विराटाला नाही, कोठे येणे जाणे…
- सदा सर्वकाळ, सर्वत्र व्यापुनि असणे.
- विराटाला नाही जाण, मी तू पणे…
- मी तू पणा अभावी, नाही काही उणे.
- काही नाही उणेे, सदा सर्वदा परिपूर्णे…
- तेणे नाही त्याला, कदा दु:खाचे स्पर्शणे.
- सदासर्वकाळ लेवला असे, स्वानंदाचे लेणे…
- आपण त्याचे अंश, एकदाच भान घेणे.
- परिघातही केंद्र, क्षेत्रातही केंद्र, त्याला नाही कोठे नसणे…
- केंद्र न जाणे स्वत:ला, हे तो लाजिरवाणे!!
कृष्णदास
✦ ✦ ✦
॥ निजबोधमठी गुंजारव गीती, श्री गुरुदत्त कृष्ण सरस्वती ॥
✦ ✦ ✦
हे पृष्ठ आपल्या मित्र-परिवारांसोबत शेअर करा
⬆