ॐ
✦
अनाम साधक व सिद्ध महात्मे
- गिरीकंदरी कडेकपारी ध्याना जे रमले, ईश्वरी प्रेमा जे रमले,
- त्यांचे शब्द कुणी ऐकले? त्यांचे शब्द कुणी ऐकले?
- अंतरीची हाक ऐकुनि, संग सोडुनि विश्वाचा, ध्यास घेऊनि ईशाचा, मोह त्यागुनि मायेचा, जीवन कुरवंडिले,
- त्यांचे शब्द कुणी ऐकले?
- नाव गाव ते विसरुनि सारे, आप्तजनांसी सोडुनि दुरे, एकलेचि चालले,
- त्यांचे शब्द कुणी ऐकले?
- धुनि लावुनि वैराग्याची, धगधगीत त्या ज्वाळेमध्ये, आशा, तृष्णा, वासनांची, आहुति जे दिधले,
- त्यांचे शब्द कुणी ऐकले?
- परतत्वाचा स्पर्श घेवुनि, ईशकृपेने, भान जे विसरले,
- त्यांचे शब्द कुणी ऐकले?
- समाधीत जे लीन होऊनि, नित्यमग्न राहिले,
- त्यांचे शब्द कुणी ऐकले?
- भानावरी ते येता कधी जरी, भाव स्फुरण आले, ते प्रकट ना झाले,
- त्यांचे शब्द कुणी ऐकले?
- विश्वसंग सोडुनि चालता, ईशसंग जोडता एकटे, जे अर्ध्यावरी निमाले, जे वाटेवरी निमाले,
- त्यांचे शब्द कुणी ऐकले?
- विचार येता त्या जीवांचा, खडतरतेचा, त्यागवृत्तीचा, मन:पटला विचार हे उमटले,
- त्यांचे जीवन कुणी जाणिले?
- आज अचानक या महात्म्यांचा, आठव येता कृष्णदासा, हृदय भरुनि आले, अन् अश्रू नयनी आले,
- त्याचे हृदय कुणी जाणिले??
- शब्द असे जे, कधिचि ना, उच्चारले गेले, ते आसमंती विरले, जगाच्या कानी ना आले, ते आज इथे उमटले!
- भावविगलित या शब्दे त्यांसी, कृष्णदासे मनोमनी नमिले,
- सर्वांसी मनोमनी नमिले!!
॥ वैराग्यमठी संजीवनस्थिती, श्री गुरुदत्त कृष्ण सरस्वती ॥
✦ ✦ ✦